تاند(یکشنبه، د حمل ۲۲) د هرات ــ اسلام کلا او هرات ــ تورغونډۍ لارې تېره ورځ بېرته پرانیستل شوې.
دا لارې یوه اونۍ مخکې د اسلام کلا په ګمرک کې د اورلګېدنې په پایله کې د زیانمنو شویو کسانو د اعتصاب له امله تړل شوې وې.
د هرات د والي ویاند جیلاني فرهاد تېره ورځ رسنیو ته وویل، چې د هرات ــ اسلام کلا او هرات ــ کندهار ترمنځ غځېدلې لویې لارې بېرته پرانیستل شوې دي.
د نوموړي په وینا، د دغو لویو لارو فعالیت هرات ولایت ته د ولسي جرګې او مالیې وزارت د پلاوي تر سفر او د هرات ولایت د چارواکو تر خبرو وروسته پیل شو او اعتصاب پای ته ورسېد.
د والي ویاند زیاته کړې، چې اعتصابکوونکو، چې د سلواغې د ۲۵مې په اورلګېدنه کې زیانمن شوي وو، د ور اوښتو زیانونو د جبران غوښتنه کوله.
د یادونې ده، چې د یاد اعتصاب له امله، په دغه ولایت کې د خوراکي او نورو توکو بیې لوړې شوې وې، چې د لارو له پرانیستل کېدو سره به عادي حالت ته را وګرځي.