تاند(شنبه، د حمل ۲۱) د یونان په پلازمېنه اتن کې ناپیژانده وسله والو د جنايي پېښو پر یوه خبریال ډزې کړې او وژلی یې دی.
د پولیسو په وینا، د ګیورګوس کارایواز په نامه دغه خبریال، چې له سټار تلویزیون سره یې کار کاوه او یو خبري بلاګ یې هم درلود، پرون د خپل کور مخې ته د دوو موټر سایکل سپرو له خوا په ډزو ووژل شو.
د یوې سیمهییزې ورځپاڼې د راپور له مخې، ګاونډيانو د ډزو غږ نه دی اورېدلی، فکر کېږي چې نوموړی به د بې غږه تومانچې په وسیله وژل شوی وي.
د اروپايي ټولنې په یوه غړي هېواد کې د خبریال د وژل کېدو پېښې خلک حیران کړي دي.
تر اوسه د پېښې لامل مالوم نه دی، خو د ده پر بلاګ یو بیان خپور شوی او پکې ویل شوي چې نوموړی د خپلې دندې په خاطر وژل شوی دی.
د دې پېښې په تړاو تر اوسه کوم چا څه ویلي نه دي.
د یادونې ده چې وړاندې تر دې افغانستان کې ګڼ خبریالان ووژل شول خو دا لومړی ځل دی چې په اروپایي هیواد کې خبریال په نښه کېږي.