تاند (شنبه د حمل ۲۱) د کندهار مخکیني امنيه قوماندان تادين خان له خپلې دندې استعفا ورکړې او پر ځای يې محمد شريف سرطیب د دغه ولايت امنيه قوماندان په توګه وټاکل شو.
تادین خان چې د جنرال عبدالرازق تر وژل کېدو وروسته د کندهار د امنیه قومندان په صفت دنده پیل کړې وه، تېره اونۍ یې د استعفا ورکولو راپورونه ورکړل شول.
نوموړي ويلي، دغه مسؤليت ته يې د کندهار د ولسونو او نظامیانو په غوښتنه اوږه ورکړې وه.
هغه زیاته کړې چې اوس دغه نظامي مسؤلیت د جنرال عبدالرازق یوه بل ملګري ته سپاري او خپله غواړي د هېواد په ملي سیاست، په ځانګړي ډول د سولې پروسه کې د ولس خدمت وکړي.
د راپورونو له مخې تادین خان د کندهار په استازيتوب د سولې د ملي روغې جوړې شورا د رهبرۍ غړیتوب اخیستی دی.
نوموړی د جنرال رازق تر وژل کېدو وروسته د ۱۳۹۷ کال د تلې میاشتې په وروستیو کې د کندهار امنیه قومندان په توګه معرفي شو.
د يادونې وړ ده چې د کندهار لپاره نوي ټاکل شوي امنیه قومندان، ډګروال محمد شریف سرطیب له دې مخکې د درېيمې سرحدي لوا د قومندان په توګه دنده مخته وړله.
دغه تغیرات په داسې مهال راځي چې د کندهار له څو ولسوالیو څخه هره ورځ د جګړې راپورونه ورکول کېږي، دغه راز افغان ځواکونو او طالبان یو بل ته د درنې مرګ ژوبلې اړولو ادعاوې کوي.