تاند (جمعه د حمل ۲۱) د لومړي ځل لپاره د افغان سوداګرو چینايي مالونه د غلام خان له لارې ترانزیټ او خوست ته را ورسیدل.
د خوست ولایت مطبوعاتي دفتر نن جمعه ددې ولایت د ګمرک د رئیس محمد حکیم سرتېر له قوله ویلي چې نن د لومړي ځل لپاره د چین هېواد څخه د کراچۍ بندر له لارې ترانزيټ مالونه د غلام خان له لارې خوست ته را ورسیدل.
د ښاغلي سرتېر په خبره چې د غلام خان بندر لاره د ترانزيټ لپاره تر ټولو لنډه، ګټوره او اقتصادي لاره ده او د دواړو هېوادونو پر سوداګرۍ به مثبته اغېزه ولري.
سرتېر زیاته کړه، «ددې لارې ترانزیټ د جلالتمآب ولسمشر له لمړیتوبونو، د دواړو خواوو د تجارانو او ولسونو غوښتنه وه، چې خوشبختانه د ترانزیټي مالونو لپاره دا لاره خلاصه او عملا پرې ترانزيټ ترسره کیږي.»
د یادونې ده چې څو ورځې مخکې د غلام خان بندر له لارې د افغانستان باروړونکو موټرو ته تر ميرانشاه پورې د تللو اجازه ورکړل شوه.
د خوست د والي ویاند طالب منګل په خبره چې پر سوداګريزو مالونو بار يو شمېر موټر د غلام خان بندر له لارې ميرانشاه ته اوښتي او هلته ځايي حکومتي چارواکو ورته د هرکلي ځانګړي مراسم نيولي وو.
باید وویل شي چې په ۲۰۱۴ ميلادي کال کې چې پاکستان په شمالي وزيرستان کې د سخت دريځو پرضد نظامي عمليات پيل کړل، د غلام خان بندر د هر ډول تګ راتګ پرمخ وتړل شو.
خو په ۲۰۱۸ ميلادي کې دا بندر بيا پرانېستل شو، مګر د افغانستان بار وړونکو موټرو ته د ډيورنډ کرښې ها غاړې ته د اوښتلو اجازه نه ورکول کېده.
سوداګرو تازه په خپلو څرګندونو کې ویلي چې اوس ورسره ژمنه پاکستاني چارواکو ژمنه کړې چې تر راتلونکو څو ورځو پورې به د افغانستان باروړونکو موټرو ته په ټول پاکستان کې د ګرځېدو اجازه ورکوي.