تاند(یکشنبه، د حمل ۱۵) د افغانستان ولسمشر اشرف غني به له طالبانو سره د سولې لپاره د ترکیې په غونډه کې د سولې د لارې درې پړاویزه نقشه وړاندې کړي.
رویټرز خبري اژانس ادعا کوي چې د افغانستان د ولسمشر د سولې طرحه یې لیدلې ده چې د هغې پر اساس، تر انتخاباتو مخکې د اوربند غوښتنه شوې ده.
ټاکل شوې ده چې د امریکا په وړاندیز او د ترکیې په کوربه توب روانه میاشت د طالبانو او نورو افغان شخصیتونو په ګډون برخلیک ټاکوونکې غونډه جوړه شي.
رویټرز خبري اژانس وايي چې د ولسمشر غني طرحه د امریکا د وړاندیزونو په مقابل کې وړاندې کېږي چې د افغانستان حکومت رد کړي دي.
ویل کېږي چې امریکا د افغانستان د حکومت او طالبانو د ګډ حکومت لپاره څو طرحې د افغانستان له حکومت او طالبانو سره شریکې کړي دي.
رویټرز وايي، د ولسمشر غني د طرحې په لومړي پړاو کې پر یوې سیاسي روغې جوړې د توافق او د نړیوالو تر څارنې لاندې د اوربند یادونه شوې ده.
په دوهم پړاو کې د ولسمشرۍ انتخابات، د سولې د حکومت جوړېدا او د یوه نوي سیاسي نظام لور ته تګ شامل دي.
د دې طرحې په درېیم پړاو کې د یوه قانوني چوکاټ جوړېدا، د کډوالو بېرته راستنېدا او پرمختیايي چارې یادې شوې دي.
د حکومت یوه جګپوړي چارواکي وویل چې ښاغلي غني دا طرحه مخکې لا بېلابېلو هیوادونو ته استولې ده.
د ترکیې د کنفرانس دقیقه نېټه لا څرګنده نه ده خو ځینې سرچینې وايي چې کوربه هیواد او دغه راز ملګروملتو او امریکا وړاندیز کړی چې د اپریل په ۱۶ مه دې جوړ شي.
د سولې تر څنګ د جنګ د خبرداري زنګونه کړنګول کېږي
په همدې منځ کې طالبانو نن خبرداری ورکړی چې ممکن د دولت پر ضد پراخ عملیات بیا پیل کړي.
د سیاسي چارو د کتونکو په باور د طالبانو او حکومت له لوري جګړې ته تیاري د سولې لپاره هیلې په نهیلۍ بدلولی شي.
یو شمېر امریکايي جنرالان هم لېواله دي چې د امریکا حکومت اجازه ورکړي چې د طالبانو پر ضد جګړه پیل کړي.
د امریکا په پوځ پورې تړلې ورځپاڼې ملټري ټایمز پرون په یوه راپور کې وویل، په افغانستان کې د امریکايي پوځیانو قوماندان جنرال سکاټ میلر، په منځني ختیځ کې د امریکايي پوځیانو عمومي قوماندان جنرال فرانک میکنزي او لوی درستیز جنرال مارک میلي پوښتنه کوي او حتي اصرار کوي چې دوی ته دې شنه اشاره ورکړل شي چې د طالبانو پر ضد جګړه پیل کړي او د افغان ځواکونو، چې اوس په حیرانوونکي ډول اغېزمن شوي دي، ترڅنګ ودرېږي.