تاند ( یکشنبه، د حمل ۱۵ ) وسلوالو طالبانو د یوې اعلامیې په خپرلو سره ویلي چې افغان هوایي ځواکونو د کندهار او بدخشان په ګډون یو شمیر ولایتونو کې هوایي عملیات پیل کړي او په ترڅ کې یې د دوی د جنګیالیو تر څنګ ملکي وګړو ته مرګ ژوبلې اړولي دي.
د طالبانو په اعلامیه کې راغلي: ((په دا وروستیو کې د هیواد په ګڼو ولایتونو کې د کابل ادارې د عسکرو لخوا د اشغالګرو په مخامخ هوايي او استخباراتي ملاتړ د اسلامي امارت د مجاهدينو او ولسي خلكو په وړاندې ستر ستر عملیات پيل شوي دي او اوس هم جريان لري چې د عامو خلکو ګڼ کورونه او کلي يې وران کړي دي.))
طالبانو څرګنده کړې چې افغان ځواکونو د بهرنیو ځواکونو په ملتیا د دوی جنګیالي په نښه کړي دي.
دوی خبرداری ورکوي چې که دا عملیات ونه درول شي نو دوی به هم د افغان ځواکونو تر څنګ پر بهرنیانو هم حملې پیل کړي.
خو د بدخشان والي محمد ذکریا سودا وایي چې وسلوالو طالبانو د دې ولایت په مرکز او لس ولسوالیو بریدونه پیل کړي او د دوی له مقاومت سره مخ شوي دي.
ورته مهال ملي دفاع وزارت هم ویلي چې افغان ځواکونو د بدخشان درواز سیمې چې درې کاله د وسلوالو طالبانو تر کنټرول لاندې وې تصفیه کړې دي.
له دغه وزارت څخه په خپره شوې خبرپاڼه کې راغلي، دفاعي او امنیتي ځواکونو د هوايي قواوو په ملاتړ د بدخشان ولایت نسۍ، شکي، دروازه بالا اړوند کوف آف او ارغستان ولسوالیو کې عملیات ترسره کړي او دا سیمې یې د طالبانو له شتونه پاکې کړې دي.
دفاع وزارت دغه راز ویلي چې د عملیاتو پر مهال د درېیو بهرنیانو او یو قوماندان جمعه په ګډون ۴۰ طالبان وژل شوي او ۳۰ تنه نور ټپیان شوي دي.
ملي دفاع وزارت دغه راز د کندهار په ارغنداب او هرات ولایتونو کې هم طالبانو ته د مرګ ژوبلو اړولو ادعا کړې ده.
دا په داسې حال کې ده چې تېره ورځ افغان چارواکو کابل کې یوې غونډې ته وویل چې وسلوال طالبان په لویو ښارونو د سترو بریدونو پلانونه لري خو وایي افغان ځواکونو یې پر وړاندې بشپړ چمتووالی لري.