تاند ( جمعه، د حمل ۶) راپورونه وایي، د جرمني پارلمان هغه طرحه تصویب کړه چې په ترڅ کې به یې د دغه هېواد پوځیان د راتلونکي ۲۰۲۲ کال تر جنوري افغانستان کې پاتې شي.
د رویټرز خبري اژانس د راپور له مخې، افغانستان کې د جرمن ځواکونو د عملیاتو لپاره اوسنۍ پارلماني اجازه د راتلونکې اپرېل میاشتې تر پایه ختمېدله، چې له امریکا سره د طالبانو د تړون له مخې د بهرنیو ځواکونو وتلو ته وروستۍ نېټه ده.
د جرمني پارلمان دې نوي تصویب سره افغانستان کې د دغه هېواد ځواکونه نږدې یوولس میاشتې نور هم پاتې کېدلی شي.
د یادونې وړ ده ګې دغه هېواد دا مهال افغانستان کې تر ۱۳۰۰ سرتېري لري.
خو وسله والو طالبانو د جرمن پارلمان د یادې پرېکړې په غبرګون کې ویلي چې دا پرېکړه یې د افغان جګړې د اوږدېدو په مانا ده.
د دې ډلې ویاند ذبیح الله مجاهد وایي، ښه دا ده چې د دوحې تړون مطابق ټول بهرني ځواکونه له افغانستان ووځي.