تاند ( چهارشنبه، د حوت ۲۷) د امریکا استخباراتي ادارې وایي په تېرو ټاکنو کې د ایران او روسیې د حکومتونو په رسمي لارښوونه تبلیغات او سایبري بریدونه شوي دي.
د امریکا استخباراتي او قضايي ادارو په یوه ګډه اعلامیه کې ویلي دوی داسې اسناد او شواهد موندلي، چې د ایران د مذهبي مشر آیت الله خامنه يي په لارښوونه په امریکا کې د ټاکنو پر مهال د انټرنیټي بریدونو له لارې ناندریو ته لمن وهل شوې او د ټرمپ پر ضد انټرنیټي کمپاینونه شوي دي.
امریکا همدا راز وایي چې روسي بریدګرو بیا د پوتین په لارښوونه د ټرمپ په پلویتوب کمپاینونه او سایبري بریدونه یې ترسره کړي دي.
د امریکا حکومت د دغه دواړو هېوادونو یادې کړنې غندلې او هغه یې جنایت بللې دي.
امریکا داسې مهال پر ایران او روسیې دا تورونه لګوي، چې له دې وړاندې هم د یادو هېوادونو ترمنځ اړیکې ترینګلې وې.
اوس د جو بایډن ادارې هڅه پيل کړې څو دا اړیکې بېرته ورغوي.