تاند ( دوشنبه، د حوت ۲۵) د امریکا د پوځ مرکزي قومندانۍ قومندان جنرال مک کینزي وايي له هوکړې سره سم له افغانستانه د امریکايي سرتېرو وتل به لا زیاتې ګډوډۍ ته لار هواره کړي.
جنرال کېنټ مک کینزي زیاتوي، چېکه امریکايي ځواکونه د ټرمپ له لوري طالبانو سره د شوې هوکړې مطابق له افغانستانه ووځي، جګړه به نوره هم زیاته شي.
د هغه په وینا افغان حکومت به په خپلو سیمو د واک ساتلو لپاره طالبانو سره یوه سخته جګړه کې ښکېل شي.
مک کينزي زیاتوي د امریکايي ځاکونو وتل به د دې سبب شي چې طالبان د افغانستان لویو ښارونو ته ګواښونه متوجه کړي.
په ورته مهال یوه بل لوړپوړي امریکايي جنرال هم ویلي چې بې تدبیره له افغانستان د امریکايي ځواکونو ایستل به په دغه هېواد کې خونړیو جګړو ته لار برابره کړي.
په افغانستان کې د امریکایي ځواکونو عمومي قومندان سکاټ مېلر ویلي چې باید له افغان ځواکونو د امریکا ملاتړ دوام وکړي.
د ده په خبره که امریکایي ځواکونه له افغانستان ووځي نو وضعیت به په دې هېواد کې کړکېچن شي نو له همدې امله په دې مسئله کې ديپلوماتیک فشار ته اړتیا ډېره ده.