تاند ( جمعه، د کب ۲۲ ) د پاکستان د مخابراتو ادارې د ټیک ټاک کاریال د بندولو امر کړی دی.
دغې ادارې پرون پنجشنبه دا پرېکړه د یوې محکمې د حکم په اساس اعلان کړې ده.
محکمې ویلي چې یاد کاریال یې د غیری اخلاقي او ناوړه ویډیوګانو د خپرولو په تور بند کړی دی.
د رویټر اژانس د خبر له مخې د پاکستان یوې محکمې د پاکستان د مخابراتو ادارې څخه غوښتي چې ټیک ټاک ته لاسرسی بند کړي.
خو په پاکستان کې د ټیک ټاک کاریال یو استازي ویلي چې په سیستم کې د نا مناسبو محتویاتو د خپریدو د مخنیوي لپاره قوي فلترونه لري او د غیرې اخلاقي ویډیوګانو تورونه یې بې بنسټه بللي دي.
د یادونې وړ ده چې پاکستان د تیر کال په اکتوبر میاشت کې هم د ټیک ټاک کاریال نه استفاده کول منع کړي وو، خو وروسته له هغې چې دغه شرکت د ناوړه ویډیوګانو د خپرونکو د حسابونو د بندولو ژمنه وکړه، بیرته یې ورته د فعالیت اجازه ورکړه.
د ټیک ټاک کاریال د چینایي بیټي ډانس ډلې پورې اړه لري چې په ټوله نړۍ کې شاوخوا یو میلیارد کارونکي لري.
دغه اپلکیشن په زیات شمیر هیوادونو کې د نظر له اختلافونو سره مخامخ شوی او د ځنې هیوادونو مقامات اندیښمن دي چې دغه کاریال د کارونکو معلومات د چین له حکومت سره شریکوي خو ټیک ټاک بیا دغه ادعا په وار وار رد کړې ده.
افغانستان کې هم دې وروستیو کې یو شمېر ځوانانو د ټیک ټاک کاریال څخه ګټنې ته مخه کړې او ډیری ځوانان یې د ساعت تیرۍ په موخه کاروي.