تاند ( جمعه، د کب ۲۲ ) چارواکي په نورستان ولایت کې د ۱۳۰ ښوونځیو لپاره د نویو ودانیو د جوړولو خبر ورکوي.
د کلیو بیارغونې او پراختیا وزارت چارواکي وایي، د دې وزارت وزیر مجیب الرحمن کریمي د نورستان له والي عبدالغفور ملکزی سره په لیدنه کې ژمنه کړې چې دغه ولایت کې به د ۱۳۰ ښوونځیو لپاره نوې ودانۍ جوړې شي.
د کلیو بیارغونې او پراختیا وزیر ویلي، په نورستان کې د ۲۵۰ ميلیونه افغانیو په ارزښت د ۷۱ پرمختیایي پروژو چارې روانې دي او ډير ژر به د ۲۰۰ ميلیونه افغانیو په ارزښت د ۹۷ نورو پرمختیایي پروژو کارونه هم پیل شي چې د ترانسپورټ، برېښنا، د څښاک اوبو او اوبو لګولو په برخه کې دي.
د کلیو بیارغونې او پراختیا وزارت د معلوماتو له مخې، د یادو نویو پروژو په لړ کې به دې ولایت کې د ۱۳۰ ښوونځيو ته ودانۍ جوړې شي چې عملآ یې د ۲۹ ښوونځيو د ودانیو جوړولو کارونه روان دي.
نورستان د هېواد په ختیځ کې سمسور او غرنی ولایت دی، خو عام خلک یې هلته د ښوونځیو د ودانیو د نه شتون سربېره د تعلیمي برخې د امکاناتو د کموالي څخه شکایتونه کوي.