تاند(سې شنبه، د حوت۱۲) د افغانستان د بیارغونې لپاره د امریکا ځانګړی سرمفتش وايي، د امریکايي مالیه ورکوونکو په ملیاردونو ډالرو په افغانستان کې جوړې شوې ودانۍ او تاسیسات ویجاړ شوي دي.
د امریکايي رسنیو د راپور له مخې، سیګار یا د افغانستان د بیارغونې د سرمفتش دفتر د دوشنبې په ورځ په خپل یوه راپور کې وویل چې له ۲۰۰۸ م کال راهیسې امریکا په افغانستان کې د ودانیو یا نقلیه وسایطو په رانیولو شاوخوا ۸ ملیارد ډالره لګولي چې تر ۲ ملیارد ډالره ډېر یې ضایع شوي دي.
د دې راپور پر اساس په هغو پروژو کې چې کار ورڅخه اخیستل شوی یوازې د ۳۴۳ ملیون ډالرو په ارزښت جایدادونه روغ پاتې دي.
د سیګار د راپور له مخې، د امریکا دفاع وزارت، د بهرنیو چارو وزارت او د امریکا د نړیوالې پراختیا ادارې (یوایس ایډ) لږترلږه د یوې ودانۍ د جوړولو لګښت ورکړی چې اوس هیڅ یوه د کار وړ نه ده.
راپور زیاتوي، پینتاګون یا د امریکا دفاع وزارت په جلال اباد کې د افغانستان د ملي پولیسو د ښځو پر کمپلیکس ۶ ملیونه او ۷ لکه ډالر لګولي چې هیڅکله ورڅخه کار نه دی اخیستل شوی او ښايي هیڅکله هم ورڅخه کار وانخیستل شي.
راپور زیاتوي، د امریکا د نړیوالې پراختیا ادارې په هرات کې یو ښوونځی ترمیم کړ خو لا هم ډېر کار ته اړتیا لري.
د امریکا د بهرنیو چارو وزارت د افغانستان په بېلابېلو ولایتونو کې د موبایل ټېلفون د کیفیت د ښه کېدو لپاره پر برجونو تر ۷ ملیون ډالره زیاتې پیسې لګولي خو دې ته یې پام نه و کړی چې د دغو برجونو د ساتنې لپاره هم پیسې پکار دي.