تاند (شنبه د حوت ۹) د وتلې امريکايي سندرغاړې لېډي ګاګا سپي تښتول شوي او اوس دې د خپلو سپيانو په پيدا کېدو پینځه سوه زره امریکايي ډالر سر ایښی دی.
داسې معلومېږي چې تر اوسه دومره لوړ انعام حتا امريکا د ځينو خونړيو ترهګرو پر سر نه دی ايښی.
دغې وتلې امریکايي سندرغاړې اعلان کړی چې که څوک یې سپان ورپیدا کړي، ۵ سوه زره امریکايي ډالر به د انعام په توګه ورکړي.
د سي ان ان د خبر له مخې، څو وسله والو کسانو د لېډي ګاګا پر يوه نوکر ډزې کړې دي، درې سپي يې ورڅخه تښتولي، خو يو سپی بېرته ځینې راتښتېدلی او دوه نور یې له ځان سره وړي دي.
راپورونه وايي چې د دغې سندرغاړې نوکر هم ژوبل دی او اوس دې ویلي چې په سپو پسې يې خورا زړه شين دی.
پوليس وايي، د سپي تښتوونکيو وېډيو يې لاس ته ورغلې او هڅه کوي چې ویې نیسي.
