تاند ( چهارشنبه، د کب ۶) په افغانستان کې د ملګرو ملتونو سیاسي استازوالۍ (یوناما) د سه شنبې په ورځ د (کب۵) په خپل تازه راپور کې ویلي چې افغانستان لا هم د ملکي وګړو د مرګ ژوبلې له امله د خطرناکو هېوادونو په قطار کې دی.
د یوناما په دې تازه راپور کې د ملکي وګړو د مرګ ژوبلې ارقام بیان شوي دي.
په راپور کې ویل شوي له طالبانو سره د بین الافغاني خبرو له پيلېدو وروسته ملکي تلفات زیات شوي دي چې ډېر مسولیت یې د طالبانو په غاړه دی.
یوناما وايي د دغو تلفاتو ۴۶ فیصده مسوولیت وسله والو طالبانو، اته سلنه د داعش ډلې او ۲۲ سلنه افغان سرتیرو ته ورګرځي.
د ملګرو ملتونو سیاسي استازوالۍ په راپور کې راغلي چې په ۲۰۲۰ کال کې ۱۸۸۵ ملکي وګړي د طالبانو بریدونو کې وژل شوي او ۳۵۷۴ تنه نور ټپيان شوي دي.
راپور وايي ۲۰۱۹ کال ته په ۲۰۲۰ کې د ملکي تلفاتو کچه ۱۵ سلنه ټيټه شوې، خو په وروستیو میاشتو کې د تاوتریخوالي زیاتېدو ملکي مرګ ژوبله زیاته کړې ده.
راپور کې راغلي دي چې د سولې د خبرو پیل هم ” ونه توانیده چې ملکي وګړو ته د زیان اوښتو کچه راټیټه کړي”.
په افغانستان کې د ملګرو ملتونو سیاسي استازوالۍ دغه راز ویلي چې د ۲۰۲۰ کال په وروستیو کې خبریالان، مدني فعالان، بشري فعالان او د امنیتي سرتیرو د کورنۍ غړي په هدفي بریدونو کې په نښه شوي دي.
په راپور کې ویل شوي چې ملکي مرګ ژوبلې ته په کتو افغانستان لا هم د ملکي وګړو لپاره د مرګونو هیوادونو په قطار کې دی.
دا په داسې حال کې ده چې افغان حکومت تر دا مهاله د یوناما د دې تازه راپور په اړه کوم غبرګون ندی ښودلی خو طالبانو بیا دا راپور رد کړی دی.