تاند ( دوشنبه، د کب ۴) د افغانستان لپاره د ملګرو ملتونو مرستندویه مأموریت یوناما وایي، په افغانستان کې د ملکیانو د خوندیتوب په اړه به سبا ( سې شنبه، د کب ۵ ) کلنی راپور خپور کړي.
د افغانستان لپاره د ملګرو ملتونو د سرمنشي ځانګړي استازي دیبرا لاینز نن دا خبره پر خپل ټوېټر لیکلې ده.
هغه ویلي، د تېر۲۰۲۰ کال د راپور یو مهم هدف دا دی چې ښکېلو مسوولو لوریو ته په دې اړه حقایق او سپارښتنې وړاندې کړي.
د نوموړي په وینا د دې راپور په خپرولو سره باید ښکېل لوري د ملکیانو د خوندیتوب لپاره سمدستي کوټلي اقدامات ترسره کړي.
دیبرا لاینز دغه راز له ښکېلو خواوو غوښتي چې د نورو زیانونو د مخنیوي لپاره دې په عاجلو اقداماتو کې یوه ورځ هم نهسپموي.
یوناما له دې مخکې ویلي و چې په دې هېواد کې د ۲۰۲۰ کال په لومړیو ۹ میاشتو کې د تېر کال همدې مودې په پرتله په ملکي تلفاتو کې ۳۰ سلنه کموالی راغلی.
په دې راپور کې د ملکي تلفاتو د کموالي عمده لامل په انتحاري او هوايي حملو او همداراز ځمکنیو جګړو کې کموالی په ګوته شوی.
دا په داسې حال کې ده چې د وروستي تاوتریخوالي په ترڅ کې د ملکي مرګ ژوبلې کچه خورا لوړه شوې او په لړ کې یې هره ورځ د هېواد له بېلا بېلو ولایتونو څخه د ملکیانو د مرګ ژوبلو راپورونه ورکول کیږي.