تاند (دوشنبه د دلوې ۲۷) د خیبرپښتونخوا په جنوبي وزیرستان کې د پوځ پر موټریز کاروان چاودنه کې لږ تر لږه ۹ پاکستاني پوځیانو ته مرګ ژوبله اوښتې.
د جنوبي وزیرستان د پولیسو مشر شوکت علي ویلي، دا پېښه تېره ورځ ناوخته د جنوبي وزیرستان د واڼه په بایي سړک د ماین چاودنې له امله رامنځته شوې چې په پایله کې یې درې پوځیان وژل شوي او شپږ نور ټپيان دي.
د نوموړي په وینا چاودنه د ګزمې په موټر شوې ده چې یاده مرګ ژوبله یې اړولې.
د تحریک طالبان پاکستان (ټي ټي پي) یوه ویاند د چاودنې مسؤلیت پر غاړه اخیستې او د ورته نورو بریدونو خبرداری یې ورکړی دی.
د یادونې وړ ده چې تر دې وړاندې هم پر پاکستاني پوځیانو د ګڼ شمېر بریدونو مسؤلیت تحریک طالبان پاکستان ډلې منلی دی.