تاند(چهارشنبه، د دلوی ۲۱) د امریکا پوځ وايي، په تېرو شلو کلونو کې په لومړي ځل یو کال داسې تېر شو چې هیڅ امریکايي پوځي په افغانستان کې ونه وژل شو.
د فاکس نیوز تلویزیون د راپور له مخې، د پوځ دوه سرتېري جاویر ګوتیریز او انتونیو رودریګودیز وروستي امریکايي عسکر وو چې تېر کال په افغانستان کې وژل شوي وو. د پوځ دوه نور عسکر این مک لوګلین او میکول ویلان د تېر کال په جنورۍ کې وژل شوي وو.
د امریکا او طالبانو ترمنځ د سولې موافقه د ۲۰۲۰ د فبرورۍ په ۲۹ لاسلیک شوه. د دې موافقې پر اساس طالبانو ژمنه کړې چې پر بهرنیو پوځیانو به برید نه کوي.
د ملیټري ټایمز ورځپاڼې د راپور له مخې، طالبانو ویلي چې که د امریکا ولسمشر جو بایډن د تېر کال د فبرورۍ د ۲۹ نېټې د موافقې پر اساس د اپریل له میاشتې وروسته په افغانستان کې خپل پوځیان وساتي، دوی به بیا د امریکايي پوځیانو پر ضد جګړه پیل کړي.
خو دې ته په کتو چې طالبانو د قطر د موافقې پر اساس له تروریستي ډلو سره اړیکې نه دي پرې کړي او د دایمي سولې لپاره د افغانستان له حکومت سره د سولې خبرې نه کوي او د دې پر ځای د امریکا له رقیبانو لکه ایران او روسیې سره د خبرو لپاره دغو هیوادونو ته سفرونه کوي، ګومان کېږي چې د امریکا نوی حکومت به د مې تر لومړۍ پورې خپل پاتې ۲۵۰ پوځیان له افغانستانه ونه باسي.
ګڼ لوېدیځ پوځي شنونکي وايي، همدومره پوځیان کافي دي چې له پرمختللې ټکنالوژۍ څخه په استفادې د طالبانو ځپلو ته تر هغو دوام ورکړي چې دا ډله سولې ته چمتو شي. دوی باور لري چې د کم شمېر پوځیانو شتون له یوې خوا د امریکا پوځي لګښتونه کموي او له بلې خوا د تلفاتو مخه نیسي.
د فاکس نیوز د راپور له مخې، د متحدو ایالتونو د ملي امنیت سلاکار جېک سولیفان تېره میاشت (د جنورۍ ۲۲) له خپل افغان ساري حمدالله محب سره په خبرو کې وویل چې امریکا به له طالبانو سره د ټرمپ د حکومت د فبرورۍ د ۲۹ نېټې پر موافقې بیاکتنه وکړي.