تاند (سه شنبه د دلوې ۲۱) په کابل ښار کې په دوو بېلو امنیتي پېښو کې شپږو کسانو ته مرګ ژوبله اوښتې ده.
لومړۍ پېښه نن سهار د کابل ښار د شپاړسمې امنیتي حوزې اړوند سیمه کې پر یوه لنډکروزر ډوله موټر د یوې چاودنې له امله شوې چې دوه کسان په کې ټپیان شوي.
د یو بل خبر له مخې، امنیتي سرچینو ویلي چې ناڅرګندو وسله والو نن سهار شاوخوا ۹:۲۰ بجې د کابل ښار د پنځمې امنیتي حوزې اړوند په باغ داوود سیمه کې د میدان وردګ ولایت د کلیو او پراختیا ریاست پر کارکوونکو وسله وال برید کړی دی.
د راپورونو له مخې په دې پېښه کې د میدان وردګو ولایت د کلیو او پراختیا ریاست د سرپرست ریاض احمد په ګډون څلور کسه وژل شوي دي.
د کابل د امنیه قومندانۍ ویاند فردوس فرامرز وايي په دې پېښه کې د محمد حبیب، فریدالله، ریاض احمد او بریالي په نوم د کلیو او پراختیا ریاست څلور کارکوونکي وژل شوي دي.
تر اوسه ددغو دواړو پېښو مسؤلیت کومې ډلې نه دی منلی.