تاند ( سې شنبه، د دلوې ۲۱ ) افغانستان د عامې روغتیا وزارت د پولیو ویروس د دوهم ډول د خپرېدو خبر ورکوي.
د دغه وزارت د چارواکو په خبره، تر اوسه په هېواد کې ٣٠٣ پېښې د دغې نوي ډول په نښه شوي دي.
په داسې حال کې چې په افغانستان کې لا هم ماشومان د پولیو یا ګوزڼ ویروس د اخته کېدو له ګواښ سره مخ دي.
په ٢٠٢٠ میلادي کال کې د پوليو د ۵۶ پېښو تر ثبتېدو وروسته د عامې روغتیا وزارت د ماشومانو د ګوزڼ د دوهم ډول د ۳۰۳ پېښو د ثبتېدو خبره کوي.
د دغه وزارت سرپرست وحید مجروح په کابل کې ولس ته د دولت د حساب ورکوونې په ناسته کې وویل، چې پاکستان ته په پراخه کچه د خلکو تګ راتګ ددغه ویروس د خپرېدو ستر لامل دی.
دا په داسې حال کې ده، چې په وروستیو دریو کلونو کې طالبانو په جنوبي ولایتونو کې کور په کور د د دغه ویروس واکسین ته اجازه نه ورکوي.
د طالبانو د دې ګواښ سره دوه نیم میلیونه ماشومان په هلمند، ارزګان او د کندهار په شمال کې د پولیو له واکسین بې برخې شوي دي.
افغانستان او پاکستان دوه هغه هېوادونه دي چې لا هم په کې ماشومان د پولیو یا ګوزڼ په ويروس باندې اخته کېږي.
روغتیا پالان د پولیو د دوهم ډول ویروس خپرېدل د افغان ماشومانو لپاره يو نوی ګواښ بولي.
د نا امنیو تر څنګ په هېواد کې د کرونا ویروس خپرېدل د پولیو له واکسین نه د ماشومانو محروم پاتې کېدو بل ستر لامل بللی کېږي.
عامې روغتیا وزارت وايي، د پوليو واکسين د تطبیق تر څنګ د دغه ویروس پر وړاندې د ټولو د ایمني سیسټم پیاوړتیا هغه څه دي چې د دغه وزارت او نړیوالو بنسټونو لومړیتوب جوړوي.