تاند (دوشنبه د دلوې ۲۰) په شمال کې د پوځ چارواکي وايي چې افغان ځواکونو د بلخ او جوزجان لپاره د طالبانو استخباراتي مسؤل نیولی دی.
په شمال کې د ۲۰۹ شاهین قول اردو نن دوشنبه د یوې خبرپاڼې په خپرولو سره ویلي، د طالبانو دغه استخباراتي مسؤل په مزار شریف ښار کې نیول شوی دی.
سرچینې زیاته کړې، روزي خان د میرآجان زوی دی او د بلخ د چهاربولک او د جوزجان د فیض آباد ولسوالیو لپاره د طالبانو استخباراتي مسؤل و.
د یو بل خبر له مخې، افغان هوايي ځواک پرون په فاریاب ولایت کې د طالبانو پر غونډو بریدونه کړي.
د ۲۰۹ شاهین قول اردو وايي، دغه بریدونه د فاریاب په قیصار، ینګي قلعه او شېرین تګاب ولسوالیو کې شوي چې په ترڅ کې یې ۱۴ طالبان وژل شوي او ۶ نور ټپیان شوي دي.
سرچینه وايي، په دې هوايي بریدونو کې د طالبانو یوه اندازه وسلې او مهمات هم له منځه وړل شوي دي.
طالبانو تر اوسه ددې پېښو په هکله څه نه دي ویلي.