تاند (یک شنبه، د دلوې ۱۹) د کورنیو چارو وزارت ویاند طارق ارین د یوه خبري کنفرانس پرمهال ژمنه وکړه چې، دوی به د وژل شویو سرتېرو کورنیو ته کاري زمینې برابرې کړي.
هغه وايي چې په ۱۴۰۰ کال کې د وژل شویو سرتېرو د وارثانو لپاره ۴ زره بورسیې هم په نظر کې نیول شوي دي.
طارق آرین زیاته کړه چې د امنیتي ځواکونو په لیکو کې د وژل شویو سرتېرو کورنیو ته یوه اندازه پیسې او یوه نمره ځمکه هم ورکول کیږي.
هغه زیاته کړه که د امنیتي ځواکونو لیکو کې د وژل شویو کسانو ستونزو ته په رسېدنه کې څوک بې پروايي وکړي له دندې به ګوښه شي.
کورنیو چارو وزارت داسې مهال په امنیتي لیکو کې د وژل شویو سرتېرو کورنیو ته د پاملرنې ډاډ ورکوي چې له دې وړاندې پر دې وزارت له همدې امله سختې نيوکې وې.
عامو افغانانو ویلي حکومت د وژل شویو سرتېرو کورنیو ته پام نه کوي.
خو تازه دې پرېکړې ټولنیز فعالین هم خوښ کړي دوی وايي، افغان سرتېري د هېواد او ولس ساتنه کوي او باید یې کورنیو ته هم پاملرنه ډېره شي.