تاند ( یک شنبه، د دلوې ۱۹) د ملګرو ملتونو د روغتیا سازمان کواکس پروګرام مسوولان وایي چې دوی به په لومړۍ مرحله کې ددغه پروګرام د غړو هېوادونو پر ۳۳۰ میلیونه وګړو د کورونا واکسین وویشي.
د ملګرو ملتونو نړیوال سازمان ویلي چې د هند، امریکا او چین په شرکتونو کې جوړ شوي واکسین د دوی په واک کې دي او ټاکل شوې چې د روان میلادي کال تر نیمایي د کواکس پروګرام د غړو هېوادونو پر ۳۳۰ میلیونه وګړو دغه واکسین وویشل شي.
د کواکس پروګرام د ملګرو ملتونو د روغتیا نړیوال سازمان له لوري جوړ شوی چې، موخه یې په عادلانه توګه پر ټولو هېوادونو د کورونا واکسین وېشل ښودل شوي دي.
نږدې ۱۹۰ هېوادونه د دغه پروګرام غړیتوب لري چې ځينې یې د واکسین تولیدوونکي او ځینې یې مصرفوونکي دي.
کورونا ناروغي چې لومړی په چین کې راڅرګنده شوه لا هم د نړۍ ګڼ هېوادونه یې د دوهمې څپې قربانیان دي.