تاند ( شنبه، د دلوې ۱۸) د متحده عربي اماراتو په لس اوره سوداګریزو سیالیو کې تېره شپه د ټيم ابوظهبي او ناردرن واريرز لوبډلو ترمنځ لوبه ترسره شوه.
د لوبې په پيل کې واريرز پچه وګټله او ټيم ابوظهبي ته يې د توپ وهنې بلنه ورکړه.
ټيم ابوظهبي په ټاکلو ١٠ اورونو کې د ٧ لوبغاړو په سوځېدو ١١٤ منډې وکړې.
د دوی لپاره پال سټرلينګ ٤٨، کلارک ١٦ او جېمي اويرټون ١٥ منډې وکړې.
د ناردرن واريرز له لوري فابين الين غوره توپ اچونه وکړه او د مقابلې لوبډلې ٤ لوبغاړي یې وسوځول.
ناردرن لوبډلې ۱۱۵ هدف د وروستي اور په ۴ ام بال پوره او د ۳ لوبغاړو په سوځېدو یې لوبه په خپل نوم کړه او پای لوبې ته یې لاره پيدا کړه.
د واریرز لپاره رومان پاويل ٤٩ او سيمونس ٤٦ ناسوځېدلې منډې وکړې.
د يادولو ده چې، له دې وړاندې د رحمن الله ګوربز اړوند ډيلي بولز لوبډلې لاره پېدا کړې ده.
پاي لوبه به نن د ډيلي بولز او ناردرن واريرز لوبډلو ترمنځ ترسره شي.
داغه راز نن به د درېيم مقام لپاره هم د ټيم ابوظهبي او قلندرز لوبډلو ترمنځ لوبه ترسره شي.