تاند (جمعه د دلوې ۱۷) ملګري ملتونه وايي، په یمن کې د القاعدې شبکې مشر خالد باطرفي نیول شوی او مرستیال یې سعد بن عاطف العوقلي د یمن په ختیځ کې څو میاشتې وړاندې د عملیاتو پر مهال وژل شوی دی.
تر دې مخکې هم د باطرفي د نیول کېدو راپورونه ورکړل شوي و.
د افراطي ډلو په چارو کې د ملګرو ملتونو کارپوهانو امنیت شورا ته په یوه راپور کې د خالد باطرفي نیول کېدل تایید کړي دي.
په یمن کې د القاعدې غړي چې د عربستان په ټاپو وزمه کې ځانونه ددغې ډلې مشران بولي، په تېرو نژدې دوو لسیزو کې د امریکا د بې پیلوټه الوتکو هدف ګرځېدلي دي.
سربېره پر دې، د علي عبدالله صالح د واکمنۍ پر وخت هم دولت او له هغه راوروسته د کورنۍ جګړې د اصلي لوریو ځواکونه د القاعدې پر ضد جنګېدل.
ویل کېږي دې شبکې په یمن کې د یو شمېر سیمو د نیولو هڅې کړي او دغه راز یې مرګوني بریدونه ترسره کړي دي.
د ملګرو ملتونو راپور دا نه ده په ډاګه کړې چې باطرفي په څه ډول نیول شوی او چېرته ساتل کېږي.
بله خوا ځیني ناتایید شوي راپورونه وايي چې باطرفي، د عبدرب منصور هادي ځواکونو نیولی او سعودي عربستان ته یې سپارلی دی.