تاند ( چهارشنبه، د دلوې ۱۵) د میدان وردګو د ولایتي شورا ځینې غړي وایي د عليپورغیر مسوولو وسله والو تېره شپه د ولسوالۍ پر ودانۍ برید کړی.
دوی وایي د دې برید له امله نښته رامنځته شوې او امنیتي ځواکونو شاتګ کړی دی.
د یاد ولایت د ولایتي شورا غړي وایي دمګړی ولسوالي د عليپور وسله والو ته پرېښودل شوې ده.
بل لورته ځایي سرچینو رسنیو ته ویلي چې، تېره شپه د علي پور وسله والو کسانو د بهسودو ولسوالۍ پر ودانۍ برید کړی او د ولسوالۍ ودانۍ یې نيولې ده.
امنیتي مسوولینو تر اوسه په دې اړه څه نه دي ویلي.
دا راپورونه داسې مهال خپرېږي چې د افغانستان د ملي امنیت شورا یو پلاوی د مرکزي بهسودو ولسوالۍ ته تللی او هڅه کوي ستونزه د خبرو له لارې حل کړي.
امنیت شورا وایي چې پلاوي یې د پېښې په اړه پلټنې پيل کړې دي.
د یادونې ده چې عليپور تېره ورځ د کورنیو چارو وزارت له پخواني امنیتي مرستیال جنرال مردا علي مراد سره هم کتلي وو.
بلخوا په رسنیو کې ځینې خپاره شوي انځورونه ښيي چې د عليپور وسله والو په ولسوالۍ کې ځینو ودانیو او تجهیزاتو ته اور ورته کړی دی.