تاند (جمعه د دلوې ۱۰) ولسمشر غني د عامې روغتیا وزارت مرستیال ډاکټر وحید مجروح د دغه وزارت د سرپرست په توګه ټاکلی دی.
د ولسمشر مرستیال ویاند دوا خان مینه پال وايي، د دې لپاره چې د دغه وزارت کارونه له خنډ او ځند سره مخامخ نه شي، ډاکټر وحید مجروح د عامې روغتیا وزارت سرپرست وټاکل شو او د دغه وزارت چارې به پر مخ وړي.
ښاغلي مینه پال نن جمعه پر خپله ټوېټرپاڼه لیکلي: « دنوي کاندید وزیر ترټاکلو پورې، ولسمشر دیو حکم پراساس ډاکتر وحید مجروح دعامي روغتیا وزارت سرپرست کړ.»
وحید مجروح تر دې مخکې د عامې روغتیا وزارت د روغتیايي خدماتو وړاندی کولو د مرستیال په توګه دنده ترسره کوله.
د یادونې وړ ده چې څه موده وړاندې ملي امنیت او لويې څارنوالۍ د عامې روغتيا د پخواني وزیر احمد جواد عثماني څلور نژدې خپلوان د رشوت اخیستلو په تور ونیول.
د رشوت په تور د جواد عثماني د څلورو خپلوانو تر نیول کېدو وروسته نوموړی د ولسمشر د حکم پر اساس له دندې ګوښه شو.