تاند( دوشنبه، د دلوې ۶) د ننګرهار په مرکز جلال اباد ښار سراج العمارت بڼ کې د دودیزو خوړو دوه ورځنی نندارتون پرانیستل شو.
دا نندارتون چې نن دوشنبه پرانیستل شو سبا سه شنبه به هم پرانیستی وي او په کې به د دې ولایت مشهور خواړه نندارې ته اېښودل شوي وي.
مسوولین وایي چې دا نندارتون یې د ننګرهار د اصلي کلتور د ښودنې په خاطر په لاره اچولی څو، خلک د ننګرهار اصلي دودیز خواړه وپېژني.
د جلال اباد ښاروال اباسین امرخېل وایي په نندارتون کې د دې ولایت مشهور خواړه شوله، سيخ کباب، روش، دوپيازه، وريت شوې غوښه، چرګ، د شفتلو سابه، پنيرک سابه، جواری، چولې او نور نندارې ته اېښودل شوي دي.
هغه هیله وښوده چې د دې دوه ورځني نندارتون په ترڅ کې به یو ځل بیا خلک د ننګرهار د خوړو سره اشنا او د بیا ځل لپاره به دود شي.
د نندارتون لیدونکي هم د چارواکو د دې اقدام ستاینه کوي.
دوی وایي ډېری هغه خواړه چې دوی یې نوم اورېدلی وو نن یې په عمل کې په دې نندارتون کې ولیدل او وخوړل.
د یادونې ده چې دا لومړی ځل دی په ننګرهارکې د دودیزو خوړو نندارتون پرانیستل کېږي.