تاند (دوشنبه د دلوې ۶) کندهار ولایت کې پر یوه مسافر وړونکي ۴۰۴ ډوله موټر د سړک د غاړې ماین چاودنه شوې چې له امله یې ۷ کسانو ته مرګ ژوبله اوښتې ده.
دغه چاودنه نن سهار شاوخوا ۰۵:۰۰ بجې په میوند ولسوالۍ کې د یوه خصوصي شرکت په مسافر وړونکي موټر شوې ده. د لومړنیو معلوماتو له مخې په دې پېښه کې یو تن وژل شوی او پینځه نور ټپیان دي.
د راپورونو له مخې، دغه بس موټر له کابل څخه نیمروز ته هغه مسافر لېږدول چې ایران ته د مزدورۍ لپاره روان و، خو د کندهار په میوند ولسوالۍ کې پرې د سړک د غاړې ماین چاودنه وشوه.
د میوند ولسوالۍ ولسوال حاجي عبیدالله رسنیو ته ویلي، وسله والو طالبانو تازه دغه ماین په خامه سړک کې ځای پر ځای کړی و چې ولسي وګړي یې ښکار شول.
د نوموړي په وینا د طالبانو د ګواښونو له کبله د دې ولسوالۍ په ځينو برخو کې موټر له عمومي سړک څخه خامې ته ښکته کېږي چې نننۍ پېښه هم د همدې له امله وشوه.
د کندهار د میوند ولسوالۍ ولسوال زیاته کړې، د دوی لومړني معلومات ښيي چې په دې پېښه کې یو تن وژل شوی او پینځه نور ټپيان دي. دده په خبره د ځینو ټپیانو روغتیايي حالت هم نازک دی.