تاند (سه شنبه د جدي ۳۰) په افغانستان کې د ۱۸،۴ مېلیونه کسانو له ډلې چې بشري مرستو ته اړتیا لري، ۹،۷ مېلیونه یې ماشومان دي.
د ماشومانو د ملاتړ د نړیوال سازمان د شمېرنو له مخې یوازې د تېر میلادي کال په نهو میاشتو کې په ټول هېواد کې د جګړو له امله نږدې شپږ زره تنو ته مرګ ژوبله اوښتې، چې یو پر درېیمه برخه یې ماشومان دي.
د پېښو پر وړاندې د چمتووالي په چارو کې د دولت وزارت وایي، چې په روان کال کې جګړو او ناامنیو ۵۰ زره کورنۍ زیانمنې کړې دي.
د ماشومانو د ملاتړ ادارې په تازه راپور کې د افغانستان له خلکو په تېره بیا ماشومانو سره د مرستو پر ډېرېدو ټینګار شوی دی.
د یاد راپور له مخې په افغانستان کې ۹،۷ مېلیونه ماشومان لومړنیو بشري مرستو ته اړتیا لري.
د ماشومانو د ملاتړ ادارې ویانده مریم عطايي ویلي: “له ماشومانو د ملاتړ نړیوال دفتر په افغانستان کې د بشري مرستو لپاره ډیرې مرستې غوښتي دي. “
جګړو او تاوتریخوالي سږکال د هېواد په بېلابېلو برخو کې لسګونه کورنۍ بې ځایه کړې دي.
د ماشومانو د ملاتړ د نړیوالې ادارې د شمېرو له مخې، په ۲۰۲۰ میلادي کال کې په افغانستان کې د جګړو او نا امنیو له امله نږدې شپږ زره تنو ته مرګ ژوبله اوښتې ده، چې یو پر درېیمه برخه یې ماشومان دي.
دغه بنسټ په روان میلادي کال کې د افغانستان له خلکو سره د مرستې لپاره د لږتر لږه ۱،۳ مېلیارده ډالرو بشري مرستې غوښتنه کړې ده.