تاند(سه شنبه، د جدي ۳۰) د کابل ښار څلورمې امنیتي حوزې اړوند پروان ۳ سیمه کې پر یوه کرولا موټر چاودنه شوې چې له کبله یې څلور کسان ټپیان شوي دي.
امنیتي سرچینې وایي، دغه چاودنه څو شېبې وړاندې د کابل ښار څلورمې امنیتي حوزې اړوند پروان سي سیمه کې رامنځته شوې چې له کبله یې څلور کسان ټپیان شوي دي.
بل خوا د کابل د پولیسو ویاند فردوس فرامرز له رسنیو سره په خبرو کې ویلي، چې دغه پېښه د اورلګېدنې له کبله رامنځته شوې او تراوسه معلومات نشته چې یاد موټر د څه له کبله اور اخیستی دی، خو هغه وایي چې چاودنه نه وه.
نوموړي ویلي، په دې پېښه کې دوه کسان ټپیان شوي دي.
بل لورته د اروزګان مرکز ترینکوټ ښار اړونده غازي امان الله خان څلورلارې کې پر یوه فلډر موټر د موټرسایکل بم چاودنه شوې.
په دې پیښه کې د یوې ښځې په ګډون ۷ کسان ټپیان دي.
دا په داسې حال کې دی چې په دې وروستیو کې په کابل ښار او نورو ولایتونو امنیتي ستونزې زیاتې شوې دي او هره ورځ کابل ښار د څو چاودنو شاهد وي چې درنې مرګ ژوبلې هم له ځانه سره لري.