تاند (یکشنبه د جدي ۲۹) د افغانستان په شمال کې د افغان پوځ چارواکي وايي چې د فاریاب د المار ولسوالۍ لپاره د طالبانو نومول شوی ولسوال ملا نادر ووژل شو.
د ۲۰۹ شاهین قول د شنبې په شپه د یوې خبرپاڼې په خپرولو سره ویلي چې ملا نادر پرون له افغان ځواکونو سره په مخامخ نښته کې وژل شوی دی.
په خبرپاڼه کې دغه راز راغلي، ملانادر چې په فیضي مشهور و، څه موده وړاندې له افغان پوځ او کومانډویانو سره په وسله واله نښته کې ټپي شوی هم و، خو پرون ووژل شو.
سرچینې زیاته کړې، نوموړی د طالبانو یو له مهمو او مطرحو کسانو څخه و چې د فاریاب په المار ولسوالۍ کې یې د بشر ضد ډېرو جنایاتو کې مستقیم لاس درلود.
طالبانو تر اوسه په دې هکله کوم غبرګون نه دی ښودلی.