تاند (سه شنبه د جدي ۲۳) په خوست کې لسګونه ځوانانو او ددې ولایت اوسیدونکو د ولایت مقام او اداري کمپلکس دروازه د اعتراض په توګه وتړله.
دوی د ګډو دولتي ادارو ودانیو یا اداري کمپلکس مخې د اعتراض په توګه راټول شوي او له مرکزي چارواکو د ضیا ودان په وژنه کې د عامیلینو د نیولو غوښتنه کوي.
د دوی په خبره چې حکومت تل د ورته پېښو د عاملینو په نیولو او په دقیقه د پېښو په پلټنه کې پاتې راغلی دی.
د عامه ساتنې ملي تصدۍ مطبوعاتي مسؤل ضیا ودان دوه ورځې وړاندې سهار مهال دندې په لاره و چې د کابل په کارته نو سیمې په دویم سړک کې د مقناطیسي ماین په چاودنه کې له خپل اوښي او یو بل همکار سره یو ځای ووژل شو.
د کورنیو چارو وزارت ویلي، چې د ودان قضیه به وڅیړي، خو د دوه ورځو په تېرېدو سره یې رسنیو ته څه نه دي ویلي.