تاند (پنجشنبه د جدي ۱۸) نامعلومو وسله والو په کابل کې ښار کې د افغانستان د هوايي ځواک د یوه پېلوټ په ګډون دوه تنه ووژل.
د راپورونو له مخې دا پېښه نن له غرمې مخکې شاوخوا ۱۱:۰۰ بجې د کابل ښار په پنځمه ناحیه کې د خوشال خان مېنې د املاکو د لارښوونې په یوه دفتر کې رامنځته شوې ده.
ویل کېږي په دې پېښه کې د املاکو د لارښوونې خاوند ټپي شوی دی.
د یادونې وړ ده چې تېره اوونۍ په کندهار کې هم د مسعود اتل په نوم یو پېلوټ په هدفي برید کې وژل شوی و.
په وروستیو دوو میاشتو کې لسګونه، خبریالان، د مدني ټولنې فعالان او نور کدرونه په هدفي بریدونو کې وژل شوي خو مسؤلیت یې چا په غاړه نه دی اخیستی.
که څه هم د افغانستان حکومت ددغو هدفي وژنو پړه پر وسله والو طالبانو اچوي، خو یادې ډلې بیا په خپلو څرګندونو کې ویلي چې دوی په دا ډول بریدونو کې لاس نه لري.