تاند (پنجشنبه د جدي ۱۸) د کندز ځايي چارواکي وايي، وسله والو طالبانو تېره شپه په دغه ولایت کې د ملي اردو او پولیسو په دوو قرارګاوو برید کړی دی چې په پایله کې یې اته سرتېري وژل شوي دي.
د کندز د ولایتي شورا غړی امرالدین ولي وايي، وسله والو طالبانو تېره شپه شاوخوا ۱۰:۰۰ بجې د حاجي ګلستان قبر او څرخاب سیمو کې د امنیتي ځواکونو پر پوستو بریدونه وکړل.
د نوموړي په خبره په دغو حملو کې د ملي اردو او پولیسو ۸ سرتېري وژل شوي او څلور نور ټپیان دي.
دده په خبره، وسله والو طالبانو د ملي اردو د دوو زخمي سرتېرو په ګډون ۹ نور له ځان سره بېولي دي.
امرالدین ولي زیاتوي، وسله والو طالبانو د حاجي ګلستان قبر په ساحه کې د ملي مرکز له منځه وړی او ټول نظامي تجهیزات یې له ځان سره وړي دي.
په ورته مهال د کندز امنیه قومندانۍ هم منلې چې په ياده سيمه کې جګړه شوې خو د مرګ ژوبلې په هکله یې کره جزیات نه دي ورکړي.
بل لور ته د وسله والو طالبانو وياند ذبيح الله مجاهد وايي چې تېره شپه ددې ډلې کسانو د کندز ښار اړوند د حوض په نوم سيمه کې د حکومتي ځواکونو پر مرکز بريد کړى دى.
د مجاهد په خبره چې په دغه بريد کې اووه حکومتي سرتېري وژل شوي او نهه نور ژوندي نيول شوي دي.
نوموړی زیاتوي په دې جګړه کې د حکومتي ځواکونو ګڼ شمېر وسلې او مهمات هم د طالبانو لاس ته ورغلي دي.