تاند (یکشنبه د جدي ۷) د بلخ ځايي امنیتي چارواکي وايي چې په دغه ولایت کې د یوې ترافیکي پېښې له امله څلور کسان مړه شوي دي.
د بلخ د امنیه قومندانۍ ویاند عادل شاه عادل وايي، دغه پېښه پرون مازدیګر د حیرتان مزارشریف د لویې لارې په اوږدو کې رامنځته شوې ده.
د ښاغلي عادل په خبره ددې پېښې قربانیان چې یو ماشوم هم په کې شامل دی د یوې کورنۍ غړي دي.
د نوموړي په وینا، پېښه د یوه کرولا ډوله او یوه باوړونکي موټر د ټکر له امله رامنځته شوې ده.
د یادونې وړ ده چې په افغانستان کې ډېر کله ترافیکي پېښې د موټر چلوونکو د بې احتیاطي، د ترافیکي قوانینو نه مراعتول او د سړکونو د خرابوالی له امله رامنځته کېږي.