تاند (شنبه، د جدي ۶) د افغانستان د سولې په چارو کې د دولت وزارت مسوولان وايي چې د سولې دوهم پړاو خبرو ته پوره چمتووالی لري.
سرچینه وایي چې د افغان سولې په تړاو به خبرې اترې په خپل ټاکلي وخت پيل شي.
د یاد وزارت ویانده ناجیه انوري وايي چې پلاوی دمګړی په کابل کې په مشورو بوخت دی او په بشپړ چمتووالي سره به په دوهم پړاو خبرو کې برخه واخلي.
د سولې په چارو کې د دولت وزارت داسې مهال د سولې د خبرو پر خپل وخت پيل خبر ورکوي چې له دې وړاندې یو شمېر سیاسي ګوندونو هم پر خپل وخت د سولې د دوهم پړاو د خپرو پر پيل ټينګار کړی دی.
دوی وايي چې د افغان سولې بهیر نړیواله بڼه خپله کړې او هیڅوک نشي کولی چې په مذاکرتو کې خپل ملاحظات ولري.
دا په داسې حال کې ده چې اوسمهال په دوحه کې د افغان دولت او طالبانو ترمنځ د سولې روانې خبرې د ۲۰ ورځو لپاره ځنډېدلې دي.
افغان پلاوی په کابل کې دی او دلته له چارواکو سره پر مشورو بوخت دی خو بل لورته د ملابرادر په مشرۍ طالب پلاوی اسلام آباد کې دی او هلته له پاکستاني مشرانو سره په مشورو بوخت دی.
پاکستان ته د طالب پلاوي پر سفر افغانانو هم سختې نيوکې کړې دي.
دوی وایي پاکستان تل د طالبانو ملاتړ کړی او له افغان دولت نه غواړي چې د یاد هېواد په دروغي ژمنو دې نور نه غولېږي.
خو بل لورته د پاکستان د بهرنیو چارو وزیر شاه محمود قریشي څه موده وړاندې ویلي وو چې پاکستان ته د طالب پلاوي سفر د دوی د سیاست یوه برخه ده.