تاند(پنجشنبه، د جدي ۴) د ترکیې پارلمان په افغانستان او لیبیا کې د ترک ځواکونو ماموریت ۱۸ میاشتې نور تمدید کړ.
په لیبیا کې د ترکیې د پوځیانو د ماموریت په اړه د ترکیې د پارلمان په لایحه کې ویل شوي چې د لیبیا د ملي تړون حکومت، چې د ترکیې له ملاتړه برخمن دی، په غوښتنه او د دغه حکومت د ملاتړ لپاره په لیبیا کې د ترک ځواکونو ماموریت تمدیدوي.
دا لایحه د ترکیې ولسمشر رجب طیب اردوغان ته اجازه ورکوي چې له هیواده بهر پوځیان واستوي.
د ترکیې پارلمان دغه راز په افغانستان کې د مېشتو ترک پوځیانو ماموریت د ۱۸ میاشتو لپاره اوږد کړ.
د امریکا او طالبانو له موافقې سره سم ټول امریکایي پوځیان باید د راتلونکي ۲۰۲۱ تر مې میاشتې پورې له افغانستانه ووځي خو په دې موافقه کې د ترکیې په شمول د نورو هیوادونو د ځواکونو په اړه څه نه دي ویل شوي.
د ناټو ځینو غړیو هیوادونو ویلي چې خپل پوځیان به ونه باسي.
امریکايي چارواکي هم وايي چې شاوخوا ۲۵۰۰ سرتېري به پرېږدي چې د القاعده او داعش په شان د نورو تروریستي ډلو پر ضد بریدونو ته دوام ورکړي.