تاند (شنبه د قوس ۱۵) د پکتيکا امنيتي چارواکي وايي چې د طالبانو په بريد کې د اورګون زون د سيمه ييزو پوليسو عمومي قوماندان وژل شوى دى.
د پکتيکا د امنيې قوماندانۍ وياند شاه محمد ارين وايي، تېره شپه د اورګون ولسوالۍ په پيرکوټي سيمه کې د افغان ځواکونو او طالبانو ترمنځ نښته شوې ده.
د نوموړي په وینا په دې نښته کې د اورګون زون د نهو ولسوايو د سيمه ييزو پوليسو قوماندان عيد محمد مشهور په مملي وژل شوى دی.
ښاغلي ارین زیاته کړې د یادې نښتې په نتیجه کې ۱۷ طالبان هم وژل شوي دي.
د شاه محمد ارین د معلوماتو له مخې عيد محمد له ١٨ کلونو راهيسې د پوليسو په ليکو کې دنده ترسره کوله او په پکتیکا کې د محلي پولیسو له بنسټګرانو څخه شمېرل کېږي چې د لومړي ځل لپاره یې په دغه ولایت کې محلي پولیس رامنځته کړي دي.
طالبانو تر اوسه په دې هکاه څه نه دي ويلي.