تاند (شنبه، د قوس ۱۵) د عراق د بهرنیو چارو وزیر فواد حسین تېره ورځ د بحرین هېواد د خبرو په څنډه کې د افغانستان د ملي امنیت شورا له مشر حمدالله محب سره لیدلي دي.
د رسنیو د راپورونو له مخې په دې ليدنه کې عراق یوځل بيا په افغانستان کې د خپل سفارت د پرانيستو لپاره لېوالتيا ښودلې ده.
سرچینه زیاتوي چې دواړه لوریو په دې لیدنه کې د عراق او کابل ترمنځ پر هوایي لارې هم خبرې کړې دي.
د افغانستان د ملي امنیت شورا هم په یوه خبرپاڼه کې له دې لیدنې خبر ورکړی خو د دوی له لوري په خپره شوې خبرپاڼه کې د عراق د سفارت د خلاصون په اړه څه نه دي ویل شوي.
عراقي چارواکي داسې مهال په کابل کې د خپل سفارت پرانيستو خبر ورکوي چې، په تېر ۱۳۹۶ کال کې په کابل کې د دوی پر سفارت د داعش وسله والو په برید کې د دې سفارت ۲ ساتونکي ووژل شول او ۳ تنه نور ټپيان شول.
خو هغه مهال د سفارت په برید کې عراقي دیپلوماتانو ته مرګ ژوبله نه وه اوښتې.