تاند (شنبه د قوس ۸) چین په افغانستان کې د آسترالیایي ځواکونو جنګي جنایت غندلی دی او ویلي یې دي چې د دغه کار له عاملینو سره باید قانوني چلند وشي.

د چین د بهرنیو چارو وزارت ویاند ژایو لیجان پرون جمعه په یوه خبري ناسته کې په افغانستان کې د آسترالیایي ځواکونو جنایتونه ټکان ورکوونکي بللي او وایي د دغه سرتېرو جرمونه د بشر له نړیوالو قوانینو ښکاره سرغړونه ده.

نوموړي ټینګار کړی چې آسترالیایي پوځیانو په داسې حال کې په افغانستان کې جنګي جنایت کړی چې لویدیځ هېوادونو تل ځانونه د بشري حقونو ساتونکي بللي دي.

تېره اونۍ داسې راپورونه خپاره شول چې آسترالیایي سرتیرو په افغانستان کې د خپل ماموریت پر مهال ۳۹ ملکیان وژلي دي.

د دغه راپور تر خپرېدو وروسته د آسترالیا د پوځ قوماندان جنرال انګوس کمبل له دې امله چې ځواکونو یې دغه جنایت کړی د افغانستان له دولت څخه بښنه وغوښته او ډاډ یې ورکړ چې په دې هکله به قانوني اجرات وکړي.

تازه د استرالیا د دفاع وزارت په افغانستان کې د خپلو پوځیانو د وژنو د قضیې د څارولو امر کړی دی.

دا پرېکړه وروسته له دې شوې چې یو شمېر استرالیايي پوځیانو ته خبر ورکړل شوی چې په افغانستان کې د ۳۹ ملکیانو او اسیرانو د وژلو په خاطر له پوځه د ایستلو له خطر سره مخامخ دي.

https://taand.net/%d8%af-%d8%a7%d8%b3%d8%aa%d8%b1%d8%a7%d9%84%db%8c%d8%a7-%db%b1%db%b3-%d9%be%d9%88%da%81%db%8c%d8%a7%d9%86-%d8%af%d8%ac%d9%86%da%ab%d9%8a-%d8%ac%d9%86%d8%a7%db%8c%d8%aa-%d9%be%d9%87-%d8%ae%d8%a7%d8%b7/