تاند- ټویټر غواړي چې د فیسبوک په شان داسې پیغامونو ته ځای ورکړي چې وروسته ړنګېږي یا له منځه ځي.
د اسوشیتیډ پریس خبري اژانس د راپور له مخې، د ټویټر په دې نوې برخه یا اسانتیا کې به د کاروونکو پیغامونه له ۲۴ ساعتونو وروسته په خپله له منځه ځي.
دا نوې برخه فلیټز (Fleets) نومېږي او د سنپ چټ، فیسبوک او انسټاګرام حذف کېدونکو پوسټونو ته ورته والی لري.
د فیسبوک سټوري نن سبا ډېره مشهوره ده چې وروسته حذف کېږي.
ټویټر د فیسبوک خلاف په خواصو کې ځانګړی شهرت او مینه وال لري.
ټویټر پر خپله نوې اسانتیا فلیټز (Fleets) نوم د دې لپاره ایښی دی چې ژر له منځه ځي او د هغو کسانو د ټویټونو لپاره دی چې غواړي یوه خبره یا یو تصویر له خلکو سره شریک کړي خو نه غواړي چې تبصره یا تصویر یې د تل لپاره پاتې شي.