تاند (سه شنبه د عقرب ۲۷) د ماشومانو د ملاتړ ادارې یا سیف دي چلډرن د یوې اعلامیې په خپرولو سره ویلي چې نړیواله ټولنه باید د افغان ماشومانو د زده کړو په ځانګړي ډول د نجونو د تعلیم په برخه کې مرستې ډېر کړي.

دې ادارې دغه راز د روغتیا په برخه کې هم د پانګونې غوښتنه کړې، ځکه په وینا یې د هغو ماشومانو چې په جګړو کې متضرر شوي باید روغتیايي خدمات ورته ورسېږي.

په اعلامیه کې پر کوثر ښونیز مرکز او د افغانستان په شمال ختیځو ولایتونو کې پر ښونځیو بریدونو ته اشاره شوې او زیاته کړې یې ده چې د روان ۲۰۲۰ کال په لومړیو ۹ میاشتو کې ۱۹۰۰ ماشومانو ته مرګژوبله اوښتې ده.

د ماشومانو د ملاتړ نړیوالې ادارې دغو بریدونو ته په کتو ویلي چې افغانستان په نړۍ کې د ماشومانو لپاره تر ټولو مرګونی هېواد دی.

سیف دي چلډرن وايي، د زده کړو په برخه کې پر افغان ماشومانو پانګونه د جنوبي اسیا هېوادونو په پرتله ۷۸ سلنه ټیټه ده او که چېرته همداسې دوام وکړي د افغان ماشومانو راتلونکی به له ګواښونو سره مخامخ وي.

 د ماشومانو د ملاتړ دفتر دا غوښتنه د افغانستان لپاره په جینوا کې د مرستندویه غونډې په درشل کې کړې ده، خو تازه د فلنډ د بهرنیو چارو وزیر ویلي، په جینوا کنفرانس کې ښايي له افغانستان سره د مرستو لپاره شرایط سخت شي.

https://taand.net/%d9%81%d9%86%d9%84%d9%86%da%89%d9%84%d9%87-%d8%a7%d9%81%d8%ba%d8%a7%d9%86%d8%b3%d8%aa%d8%a7%d9%86-%d8%b3%d8%b1%d9%87-%d8%af-%d9%85%d8%b1%d8%b3%d8%aa%db%90-%d9%84%d9%be%d8%a7%d8%b1%d9%87-%d8%b4%d8%b1/