تاند(دوشنبه، د عقرب ۲۶) د ارمنستان لومړي وزیر ویلي چې د قرهباغ تر جګړې وروسته یې سلګونه سرتېري تري تم شوي دي او لا هم معلومه نه ده چې هغوی څه شوي دي.
نیکول پاشینیان یو انلاین خبري کنفرانس ته ویلي، هیله لري چې ورک شوي سرتېري ژوندي پیدا شي او که چېرته یې سرنوشت نامعلوم پاتې شي نو دوی به ارو مرو له اذربایجان څخه د خپلو ورکو سرتېرو پوښتنه وکړي.
د یادونې ده چې په نګورنو قرهباغ کې تر څو اوونیو جګړو وروسته د روسیې او ترکیې په منځګړیتوب دواړو لوریو پر اوربند سلا کړې ده او ټاکل شوې چې ارمنستان لاندې کړې سیمې بېرته اذربایجان ته وسپاري.