تاند ( یک شنبه، د عقرب ۲۵) ولسمشر غني وایي، افغان دولت په هېواد کې د سولې غوښتونکی دی خو د طالب وسله والو له لوري د تاوتریخوالي دوام ښیي چې دا ډله د سولې اراده نه لري.
نوموړي چې نن یې د یو ویډیویي کنفرانس له لارې د شمالي ولایتونو له والیانو سره خبرې کولې وویل، د امنیتي او دفاعي ځواکونو مسوولیت د خاورې او خلکو ساتنه ده.
نوموړي دغه راز والیانو ته په خطاب کې وویلې چې هېڅ دولتي او نادولتي فرد له ملي امنیتي او دفاعي ځواکونو څخه د خپل شخصي امنیت د تامین په خاطر د استفادې حق نه لري.
هغه د لویو لارو د امنیت پرتامین او د طالبانو د اخاذي پر له منځه وړلو ټینګار کړی او ویلي یې دي چې، په هېڅ صورت دې اجازه نه ورکول کېږي چې طالبان عامه مالونه لوټ کړي.
افغان ولسمشر داسې مهال دا څرګندونې کوي چې، شاوخوا دوه میاشتې کېږي په دوحه کې د طالب او افغان پلاوو ترمنځ د سولې خبرې دوام لري خو کومه مثبته پايله نه لري.