تاند ( چهارشنبه، د عقرب ۲۱) د پکتیکا په سروبي ولسوالۍ کې د پولیسو په کمین کې پنځلس وسله والو طالبانو ته مرګ ژوبله اوښتې ده.
د ياد ولایت امنیه قوماندانۍ ویاند شاه محمد ارین وایي چې تېره شپه د سروبي ولسوالۍ شهاب الدين سیمه کې د پولیسو په کمین کې ۱۱ طالبان وژل شوي او څلور نور ټپیان دي.
ارین زیاتوي چې په دغه نښته کې پولیسو ته زیان نه دی رسیدلی.
نوموړی وایي پولیسو د وسله والو اړوند یو شمیر وسایط سوزولي او ځینې وسلې او مهمات هم پولیسو ترلاسه کړي دي .
بل لورته وسله والو طالبانو تر اوسه په دې اړه رسنیو ته څه نه دي ویلي.
دا په داسې حال کې ده چې په دې وروستیو کې دافغان ځواکونو او طالبانو ترمنځ جګړې سخت زور اخيستی چې عام خلک يې هم سخت اندېښمن کړي دي.