تاند (دوشنبه د عقرب ۵) د ولسمشر لومړي مرستيال امرالله صالح د کابل د امنيت په تړاو په خپله نننۍ ناسته کې وویل، چې د پاکستان ويزو کې د ګڼې ګوڼې ستونزه به ډېر ژر هواره شي.
امرالله صالح نن دوشنبه پر خپله فېسبوک پاڼه لیکلي، هغه کمېشن کاران چې له خلکو سره غیر انساني چلند کوي او د خپلو ګټو په خاطر یې ګڼه ګوڼه رامنځته کړې ده، تر پېژندنې وروسته به ونیول شي او د قانون منګولو ته به وسپارل شي.
د ځايي چارواکو په وینا د تېرې چهارشنبې په ورځ جلال اباد ښار اړوند فوټبال لوبغالي کې د پاکستاني وېزو د ټوکنو د وېش پرمهال د ګڼې ګوڼې له امله ۱۲ ښځې مړې او ۱۳ تنه نور ټپیان شول چې دې مسئلې په پراخه کچه د خلکو غبرګونونه راوپارول.
ښاغلي صالح د خپلو خبرو پر دوام ویلي، چې په کابل ښار او ولسوالیو کې د ترهګرۍ د پټې او ویدې هستې پر وړاندې، د خلکو بسیجول باید پيل شي.
د هغه په وینا، په راتلونکو ورځو کې به د هغو ترهګرو عکسونه هم د ښار په دیوالونو ولګول شي چې په ولسوالیو کې فعالیت کوي.
صالح وايي، هغه کسان چې په کابل ښار، کې یې د خلکو قتل عامونه، تنظیم کړي او تر اوسه یې فکر کاوه چې نومونه به یې یوازې په کتابونو کې پاتې وي امکان نه لري او د عکسونو تر نصبولو وروسته به خلک دوی وپیژني او په نیولو او ځپلو کې به یې ونډه واخلي.
د ولسمشر لوموړي مرستیال دا هم ویلي، چې د غوڅ ملاتړ ماموریت د ترهګرۍ او جرمونو په برخه کې له افغان ځواکونو سره په ګډه خپلې مبارزې ته دوام ورکوي.
هغه زیاته کړې، چې د هغو کسانو د ځواکمنولو په اړه به روښانه او مشخصه طرحه په پام کې ونیول شي، چې د داعش ډلې د بریدونو له ګواښ سره مخامخ دي.
امرالله صالح د ګلبدین حکمتیار هغو څرګندونو ته په اشارې سره ویلي، چې د ملیشو جوړولو او وسلې د وېش په اړه کومه برنامه نشته.
ګلبدین حکمتیار د روان کال د سنبلې میاشتې په ۷مه نېټه کابل کې د جمعې د لمانځه په خطبه کې پر افغان حکومت نیوکه وکړه چې د سولې پروسې سره مخالفت کوي او زیاته یې کړه چې د هند په مرسته په کابل او شمالي ولایتونو کې د ملېشه ځواکونو پر جوړولو کار کوي.
https://taand.net/%d8%ad%da%a9%d9%85%d8%aa%db%8c%d8%a7%d8%b1-%d9%87%d9%86%d8%af-%d8%a7%d9%88-%d8%af-%d8%a7%d9%81%d8%ba%d8%a7%d9%86%d8%b3%d8%aa%d8%a7%d9%86-%d8%ad%da%a9%d9%88%d9%85%d8%aa-%d9%be%d9%87-%da%ab%da%89%d9%87/