تاند (یک شنبه، د عقرب ۴) ولسمشرغني وایي، ملي امنیتي ځواکونو د هند نیمې وچې لپاره د القاعده ډلې د مسوول ابومحسن المصري په وژلو سره ثابته کړه، چې د تروریزم ګواښ او له بهرنیو ترهګرو ډلو سره د طالبانو اړیکې لا هم پر خپل ځای دي.
له ارګه خپرې شوې خبرپاڼه کې د ولسمشر غني له قوله راغلي: «طالبان باید عملاً د افغانستان خلکو، دولت او نړیوالو ته دا ثابته کړي، چې د القاعدې په ګډون له ټولو تروریستي شبکو او ګروپونو سره اړیکې پرې کوي، له جنګ او تاوتریخوالي لاس اخلي او د دایمي اوربند په منلو سره په هیواد کې د تلپاتې او باعزته سولې د تامین زمینه برابروي».
خبرپاڼه کاږي، افغان دولت د ترهګرۍ ضد مبارزې ته ژمن دی او هېڅکله به اجازه ورنه کړي، چې افغانستان يو وار بیا د ترهګرو پر خوندي پټنځای بدل شي.
د معلوماتو له مخې ابومحسن المصري د امريکا متحده ایالتونو د مطلوبو کسانو په لېست کې هم شامل او پر ده يې تور پورې کړی وو، چې د امريکایي اتباعو د وژلو پلانونه جوړوي او دغه راز په اوس وخت کې د القاعده ډلې دوهم مهم مشر بلل کېده.