تاند (شنبه د میزان ۲۶) د ننګرهار سیمه ییز چارواکي وايي، پولیسو نن په دې ولایت کې یو کس د وسلو د قاچاق په تړاو نیولی دی.
ددغه ولایت له رسنیز دفتره په خپره شوې خبرپاڼه کې راغلي، چې پولیسو د تاج الدین په نوم دغه کس له ۵۱ میله تومانچو او دوه میله کلاشنکوفونو سره یو ځای د مهمند درې ولسوالۍ اړوند ډکې سیمه کې د یو لړ عملیاتو په پایله کې نیولی دی.
د ننګرهار امنیه قومندان پاسوال غلام سنایي ستانکزی وايي، دغه کس له پاکستان څخه افغانستان ته وسلې انتقالولې چې د پولیسو له خوا نیول شوی، چې ډېر ژر به د قانوني اجراتو په موخه عدلي او قضايي ارګانونو ته ور وپېژندل شي.
د نوموړي په وینا نیول شوی کس د کندز ولایت د خان اباد ولسوالۍ اوسېدونکی دی.
دا په داسې حال کې ده چې په دې وروستیو کې د افغانستان په ګڼ شمېر ولایتونو کې امنیتي وضعیت ورځ تر بلې خرابېږي او ډېر کله خلک د هدفي وژنو ښکار کېږي، خو چارواکي بیا په دې برخه کې په پراخه کچه د امنیتي تدابېرو د نیول کېدو خبر ورکوي.