تاند (چهارشنبه د میزان ۹) ځايي چارواکي وايي د بدخشان د کوهستان ولسوالۍ امنیه قومندان څارمن عبدالظاهر له طالبانو سره په مخامخ جګړه کې وژل شوی.
د بدخشان د امنیه قومندانۍ ویاند ثناءالله روحاني وايي طالبانو تېره ورځ سهار نهه بجې ددغه ولایت کوهستان ولسوالۍ برید وکړ چې د شپې تر دولسو بجو یې دوام درلود.
د روحاني په خبره، په دغه برید کې د کوهستان ولسوالۍ د امنیه قومندان په ګډون دوه پولیس هم وژل شوي دي.
د ثناء الله روحاني د معلوماتو له مخې په دې برید کې څلور طالب جنګیالي هم وژل شوي او پنځه نور ټپیان شوي دي.
طالبانو تر اوسه په دې هکله څه نه دي ویلي.