تاند(سه شنبه، د میزان ۸) د افغانستان لپاره د ناټو ملکي استازي سټیفانو پانتیکورو په یوه تازه مرکه کې ویلي مرستندویه هېوادونه هغه وخت له افغانستان سره خپلو مرستو ته ادامه ورکوي چې په دغه هېواد کې د ټولو په خوښه حکومت جوړ شي او د افغانستان لا پرمختګ ته لار هواره کړي.
د هغه په خبره طالبان باید په دې پوه شي چې شل کاله مخکې ته تګ ناممکن دی او افغانان نور شاتګ نه خوښوي.
د پانتیکورو په وینا ناټو د افغانستان د سولې ملاتړ کوي خو د هغه سولې چې په افغانستان کې د شلو کلونو لاس ته راوړنې وساتي او د حکومت د پیاوړتیا او قوت سبب شي.
هغه هیله څرګنده کړې چې بین الافغاني مذاکرات ژر یوې پایلې ته ورسېږي او په افغانستان کې د روانې جګړې د پای ته رسېدو سبب شي.
پانټیکورو داسې مهال دا څرګندونې کوي چې څو ورځې وړاندې په قطر کې د افغان حکومت او طالبانو ترمنځ د سولې بین الافغاني خبرې پیل شوي چې تر اوسه کومې نتیجې ته رسیدلې نه دي.